Digitalisation de photos in pellicula

Un del plus grande disavantages del photographia analogic, in mi opinion, es que le processo de digitalisation prende multe tempore. Io ha un scanner Epson Perfection 4490 Photo que supporta le scannerisation de pelliculas e pro le qual il ha programmas de controlo sia pro Windows sia pro Linux. Illos functiona bastante ben, ma infortunatemente le procedura de digitalisation automatic non es satisfaciente: le exposition non sempre es correcte, e le algorithmo de remotion del pulvere (que normalmente se attacha al pellicula si tosto que illo es exponite al aere) pote remover alicun detalios del imagine. Pro iste ration, io usa le procedura manual, e successivemente io edita le photo in The Gimp pro remover le pulvere e altere imperfectiones. Iste operation pote prender multe tempore.
Alora, le septimana passate io ha decidite de lassar iste carga al boteca photographic, Kuvatehdas, que se trova sub le station central de Helsinki: io les ha domandate que illes digitalisava le photos e los poneva in un CD. Iste operation ha costate 15 euros, contra le 6,50€ del sol developpamento del pellicula, ma le resultato ha essite horribile: le exposition de quasi totes le photos es — in mi opinion, ma io crede que vos essera de accordo con me — errate, il ha troppo de contrasto e multe areas del photos es blanc. Io vos monstra un serie de photos, assi como illos esseva digitalisate per Kuvatehdas, e a latere io pone le version digitalisate manualmente per me:

Infortunatemente il non ha un maniera facile pro balanciar le colores, assi le coloration de alicun photos non es perfecte. Ma io spera que comocunque vos es de accordo con me, que le photos in le columna a dextera es melior. Illo poterea esser ancora melior, si io usava un technica de exposure blending (mixtura de expositiones, un technica pro componer un imagine a partir de duo o plus differente expositiones del mesme photo); infortunatemente, illo anque prenderea multo plus de tempore.

Io probara a demandar le mesme servicio de digitalisation a un altere boteca photographic, e comparar le resultato. Ma usque nunc, io debe dicer que le qualitate de digitalisation offerite per Kuvatehdas es multo deludente.