Detra le nube

Capturate in un photocamera a pellicula (film), le excellente Minolta α-7. Io attendeva le momento juste, que le sol re-appareva detra le nube.

Un infante

Un infante, preste pro un promenada autumnal.

Lena

Fin de estate. Un breve session photographic, in le vicinantias de mi casa. Io experimentava un poco con le colores in tote iste photos, excepte le prime.

Yulia

Un seniora in expectation de un filio necessita de multe attentiones.

Alexey

 

Nos non habeva multe ideas. Nos simplemente promenava per le centro del citate, e photographava de tempore in tempore. :-)

HDR

HDR (High Dynamic Range, imagines de grande extension dynamic) es un technica de photographia digital in le qual on combina diverse expositiones del mesme subjecto pro obtener un photo que conserva le detalios sia del areas clar, sia de illos obscur. Generalmente iste technica genera photographias con colores irreal o multo improbabile, e benque iste imagines pote certemente haber lor fascination, io non es particularmente attracte per illos (de facto, io los detesta). Io generalmente prefere photographias plus natural; io anque use technicas digital (e anque HDR) pro ameliorar mi photographias, ma io sempre aspira a producer imagines que appare non alterate.

Iste photographia, que io prendeva in mi recente viage in California, es obtenite per HDR de tres expositiones. Io non va explicar le processo multo in detalio, perque illo depende del programma de photoedition que on usa (io usa The Gimp, que es gratuite e open source), ma le conceptos es universal. Io partiva del imagine plus clar, e poneva super illo le imagine a exposition medie e, ancora supra, illo plus obscur. Pro iste stratos (excepte le inferior) io creava un mascara monochromatic que decide le grado de transparentia del strato (in The Gimp, nigre significa totalmente transparente, e blanc totalmente opac), assi que io prendeva le mar del photo plus obscur, le celo del photo medie e le costa verde de illo plus clar:

In plus, io reduceva le opacitate del strato plus obscur, assi que le mar non esseva troppo obscur.

Le operation que prende plus tempore, usualmente, es le creation del mascaras; e a vices il es quasi impossibile obtener un bon resultato, quando le bordos inter le areas obscur e clar es improvise o complicate (isto es le caso, per exemplo, del ramos de un arbore contra un fundo plus luminose). Ma in le caso de iste panorama il esseva particularmente facile (e necessari, perque le sol esseva contrari).

Nota anque que usualmente on besonia poner le photocamera super un tripode, assi que tote le tres expositiones sia alineate; totevia, si on non ha un tripode con se, on pote anque re-alinear le expositiones digitalmente, con un poco de patientia.

Budapest

Le secunde septimana de januario io viagiava a Budapest, pro labor. Io non habeva multe tempore pro visitar le citate; al contrario, quasi nulle! Alora, un die io decideva de eveliar me de bon tempore pro promenar e prender photos, como omne respectabile tourista.

Le die non esseva bellissime; le sol appareva e dispareva continuemente, e le celo esseva gris.

Io percurreva le mesme stratas que io habeva vidite duo noctes antea, quando con alicun amicos nos cercava un restaurante pro cenar. Io ha anque alicun photos de ille nocte; iste es le mesme subjecto, prendite de quasi le mesme puncto (isto demonstra que io es un photographo multo coherente :-) ):

Le photos es visibile in le galleria.