Un septimana retro il habeva un sol splendente (contrarimente a hodie), alora io e Yulia vadeva a Suomenlinna pro facer alicun photos e pro relaxar se con un picnic. Le picnic non esseva particularmente successose perque, nonobstante le sol, le temperatura esseva moderatamente frigide, assi que nos non remaneva static pro longe tempore. Ma ante le picnic, nos promenava un poco e io photographava mi modella in differente locationes. Le album complete es, como usualmente,
in le galleria.
Io portava le flash con me, perque io sapeva que il non haberea essite facile photographar mi modella in plen sol e del altere latere quando on misce umbra e sol in le mesme photo il es difficile obtener imagines con ambe partes (sol e umbra) ben exponite — a minus de photo-editing extreme. Le flash pote adjutar in illuminar le partes in umbra, al minus partialmente, e producer un imagine plus balanciate. Le puncto negative es que le lumine producite per le flash genera umbras con contornos multo ben definite e grande constrasto, que es generalmente un elemento nocive al qualitate del imagine. Certemente il ha multe manieras pro diffunder le lumine e render le umbras plus morbide, ma toto lo que io habeva esseva solmente un parvissime diffusor cuje effecto es quasi nulle. Isto es mi tentativa de justificar le umbras troppo dur que il ha in alicun photos. :-)
Le possibilitate de usar le flash positionate distante del camera, e operante in modalitate
wireless sin necessitate de instrumentos additional es un del characteristicas del cameras Sony α que plus io ama. Isto non es un functionalitate necessari pro le photographos professionista, qui usualmente in lor studios ha a disposition systemas de illumination multo plus avantiate; ma pro situationes simile, quando on vole viagiar sin portar troppo de peso in le bursa, isto es un ver jolly.
Le operation de balanciamento del lumine natural e del flash me requireva plure tentativas, perque il ha differente variabiles que on pote cambiar: io fixava le apertura, e postea modificava le tempore de exposition (pro alterar le incidentia del lumine natural) e le potentia del flash (pro le areas in umbra). In un de iste tentativas, quando io voleva photographar Yulia sedente sur un panca, io habeva iste resultato (le flash esseva positionate inter Yulia e le rocca con le aqua):
Le fallimento monstrava que il haberea essite possibile photographar le reflection de Yulia in le aqua, e anque haber le celo e le rocca in correcte exposition. Io non haberea pensate a iste possibilitate, perque le aqua in le rocca esseva multo surdide (on pote vider lo in altere photos) e io dubitava que illo poteva reflecter ulle cosa. :-)
Le resultato, post alicun tentativas, es isto:
Infortunatemente il non habeva ulle nube in ille momento (illo haberea rendite le fundo plus interessante), e le aqua nunquam esseva completemente static a causa del vento, lo que ha causate alicun deformation in le reflection.
(pro le plus maliciose: le indumentos del modella cambiava, ma non perque io esseva lente e illa sentiva frigido — illa se vestiva simplemente perque con ille jachetta le photo pareva melior!)
